عيب........ عيب ولا مش عيب؟!!!!

كلنا فينا عيوب و كلنا بنغلط، بس لما يقابلك في حياتك شخص فيه عيب -من وجهة نظرك- لازم تاخد بالك إن الموضوع مش أبيض و اسود، تعرفه و متعرفوش. فيه عيب ممكن تقبله في زميلك في الشغل لكن متقبلوش في صاحبك، و فيه عيب ممكن تقبله في صاحبك لكن متقبلوش في صاحبك الانتيم، و فيه عيب ممكن تقبله في صاحبك الانتيم لكن متقبلوش في شريك حياتك، و هكذا ....... عشان كدة لازم تعرف تصنف معارفك كويس عشان تتجنبب انك تظلمهم أو تظلم نفسك. بس أرجع و أقول إن اللي بالنسبالك عيب ممكن يكون بالنسبة لناس كتير مش عيب والعكس ......... و بردو فيه عيب لايمكن تقبله في أي حد.

أحيانا كتير احنا اللي بنكون السبب في بعدنا أو بعد الناس عن ربنا

أحيانا كتير احنا اللي بنكون السبب في بعدنا أو بعد الناس عن ربنا، بنرسخ جوانا قناعات غلط و نرجع بعد كدة نلوم ربنا عليها مع إن الغلطة غلطتنا من الاول. ماتجيش لما يحصلك حاجة - هي من وجهة نظرك خير - تشكر ربنا و لما يحصلك حاجة - هي من وجهة نظرك شر - تلوم ربنا. أساسا فهمك للخير والشر مش شرط يكون صح، اللي إنت شايفه خير ليك ممكن يكون شر والعكس، و بعدين ماينفعش تجادل ربنا أو تزايد عليه أو تحاسبه، و ربنا ماقالش انك موجود في الدنيا ديه عشان تكون في الجنة، فيه شر كتير بيحصل و كمان لناس ملهاش ذنب، ماهو فيه أطفال بيجيلها أمراض خطيرة و بتتعذب و بتموت، هما كانو لحقوا أساسا يرتكبوا ذنوب أو معاصي؟ ........ لو كان ربنا عايزها جنة كان خلاها كدة من الأول. إنت موجود هنا في الدنيا ديه عشان تعيش إختبار فيه الخير و فيه الشر، فلما يجيلك الخير اشكر ربنا عليه عشان ده سؤال سهل في الاختبار، و لما يجيلك الشر ادعي ربنا إنه يقويك و يساعدك انك تعدي السؤال ده على خير. لازم تكون عارف إنت موجود ليه و مطلوب منك إيه و في المقابل هتاخد إيه، لما مش بنكون عارفين أي حاجة من دول بنغلط ونبني قناعات غلط و بالتدريج بننصب نفسنا حكام ونحاسب ربنا. ربنا يهدينا جميعا و يغفرلنا.

ملخص ما كتبت على الفيسبوك

كنت قد قررت أن أراجع ما كتبت على جدار-حلوة جدار ديه- الفيسبوك حتى أجري مقارنة وألاحظ تطور الأحداث وما يتعلق بها من تعليقات......... وكانت هذه هي النتيجة من الأحدث إلى الأقدم.

(١)

اللي يشوف الشعارات اللي قاعدين بننشر فيها يقول علينا شعب في قمة الأدب و الأخلاق و الإحترام. أحب ادعوا الناس إن كل واحد يدخل عنده على ال-"wall" ويشوف بعد كل شعار من دول عمل شير لإيه و ساعتها يبقى ييجي يكلمني عن الشعارات. طبعا مش كل الناس هتلاقي تناقض كبير بس أحيانا الواحد بيسرح شوية و بيعدي عليه حاجات و مايضرش إنه يرجع يبص تاني ويراجع نفسه. على فكرة، أنا بقول الكلام ده لنفسي بردو.

(٢)

الثورة في حد ذاتها عمل غير قانوني، مفيش قانون بيعرف الثورة على انها عمل قانوني و ليه ضوابط، إذا أي محاولة لإعطاء ثورة غطاء شرعي هتكون ضحك على نفسنا والناس. الراجل جه فعلا بإنتخابات، بس عمل كوارث و بلاوي سودة تكفي إن البلد تموت في فترة قليلة، عايزني بقى أشوف حياتي و حياة أهلي و أسرتي و بلدي بتضيع قدامي و استنى عليه ٣ سنين كمان، أعتقد إن ده طلب غير منطقي. أول ثورة كانت برضه ثورة على شرعية، اه شرعية، ماهو مبارك كان رئيس، و كان شرعي، و كان قانوني، اه احنا مكناش واثقين في الإنتخابات بس هو ده كان الواقع و كانت شرعيته من القانون. نفس الكلام مع مرسي، هو شرعيته من القانون، بس ده مش معناه إن احنا واثقين فيه.

(٣)

أنا ملاحظ إن نوعية النكت المنتشرة بقت فجة أوي، شوية كمان و هيبقى عادي جدا اننا نسب لبعض الدين و نقعد نضحك.

(٤)

أنا ماسك نفسي من زمان و مش عايز أتكلم لكن بصراحة بقى أنا مستغرب من الناس اللي عاجبهم مرسي واللي معاه، فيه إيه يا جماعة، انتو عايشين في بلد تانية ولا إيه، انتو مش شايفين المسخرة والفضايح، ده احنا بقينا فاكهة الشعوب، أي شعب عايز يتسلى يفتح يتفرج على المسخرة اللي بتحصل فينا............. طب انتو مش عاجبكم المعارضة، ماشي، لكن يعجبكم مرسي والعالم اللي معاه ازاي!!!!!!! مصيبة لتكونوا فعلا شايفين انجازات.

(٥)

بيعجبني أوي البوستات اللي بتكون على شكل حوار بين طرفين، بيكون الموقف كالأتي:
١. حوار بين شخصين
٢. الشخص رقم ١، ينتمي إلى فصيل رقم ١
٣. الشخص رقم ٢، ينتمي إلى فصيل رقم ٢
٤. الشخص رقم ١ يتسم بالهدوء و العقلانية و المنطق و أدب الحوار
٥. الشخص رقم ٢ يتسم بالهبل والهطل والجهل والتخلف و قلة الأدب، إنسان زبالة و متقلعهوش من رجلك من الأخر
٦. طبعا طول الحوار والشخص رقم ١ قاعد يرزع في الشخص رقم ٢ كأنه بينجد مرتبة، والشخص رقم ٢ مدب و طبعا يستاهل، ماهو زبالة زي ما قولنا
٧. ينتهي الحوار و طبعا النتيجة واضحة، أكيد الشخص رقم ١ هو اللي صح
٨. تبدأ التعليقات بواحد يقول "الله عليك، بوست يجنن، ربنا يحفظك"
٩. التعليق اللي بعده علطول واحد بيسب و يلعن في اللي كتب البوست

طيب احنا كدة طلعنا بحاجة من أم الحوار؟ لأ طبعا، لأن الشخص الزبالة رقم ٢ هو لا يمثل الفصيل رقم ٢ انما هو مجرد عينة وسخة من الناس اللي بنشوفها في حياتنا اليومية. عشان كدة، أنا ممكن أجيب حوارين، مابين نفس الفصيلين، و تكون نتيجة الحوار الاول عكس نتيجة الحوار التاني، بس ده مش معناه إن كله زي بعضه و إن مفيش حد فيهم صح والتاني غلط، لأ طبعا، بنسبة كبيرة جدا واحد فيهم هو اللي يستحق إن احنا نتفق معه في القرار النهائي.

هنفضل طول عمرنا تايهين مابين الفصيلين طول ما الحوار مابين شخص عاقل و شخص زبالة و مش هنوصل لنتيجة غير لما يكون الحوار مابين شخصين عقلانيين.

(٦)

مفيش فايدة، الناس لسة بتعاير و بتشمت و بتتريق و بتعمل في الناس اللي هما بيعيبوه عليهم. ياريت كل واحد يدخل يبص على الوول عنده ويشوف هو بينشر فكر و أخلاق من أي نوع، و بعدين يتخيل إن بنته أو ابنه قاعد جنبه و بيتعلم من الفكر ده والأخلاق ديه عشان يكبر يقلده، و بعد كل ده المفروض مايبقاش عنده حجة لما ابنه يطلع زيه بالظبط....... اتقي الله في أولادك و أهلك اللي كلامك و مواقفك بترجع عليهم.

إنتقل إلى رحمة الله العقل ولا عزاء للاغبياء.

(٧)

"بقالك ٢٠ سنة بتاكل من هنا حواوشي..... إيه، مفيش مرة عجبك و قولت أمسي على المعلم صاحب اللقمة؟!!!" المشهد ده من فيلم "هي فوضى" كل لما اشوفه أبقى عايز اكتب الجملة ديه على البلوج بتاعتي من فوق، أصله بيفكرني بالناس اللي بتدخل تاخد اللي فيه النصيب و تمشي، ولا بتعلق ولا حتى بت"follow"

(٨)

هي الناس مش هتبطل بقى سياسة التشفي والتدليس والتريقة و خلاص. الفيسبوك بقى كله صور ملهاش أي لازمة و نكت فارغة و تلقيح بالكلام، خلاص بقى هو ده مستوانا، ولا هو أساسا ده مستوانا من زمان بس مكنش عندنا الفرصة إن احنا نبينه. بجد حاجة تقرف. ياريت كل واحد يفهم كويس إن الإسلوب ده غلط و مش أخلاقي حتى و إن كان فاكر إن الطرف التاني هو اللي ابتدى، ربنا هيحاسبك على اللي إنت بتعمله و غلط الأخرين ماينفعش يكون رخصة ليك انك تعمل اللي إنت بتعيبه عليهم...... و قال إيه مش عجيبنا الجيل اللي طالع، و هو يعني جاب القرف ده منين، ماهو مننا.

(٩)

نا لو قعدت أعمل "unlike" و "hide" لكل جروب كانت محترمة و بقت زبالة مش هخلص. ناس بتبرر البلطجة على ناس و تحرمها على ناس تانية. نصيحة لكل واحد شايف إن البلطجة مشروعة لما تكون في مصلحته، متبقاش تزعل لما ييجي اليوم اللي حد يتبلطج عليك فيه لأنك سبق و اديت نفسك الحق ده، و لو إنت شايف إن كان عندك مبرراتك، فأحب أطمنك إن اللي جي ينفخك كمان عنده مبرراته ..... يا دكر.

(١٠)

هناك خلط بين مسألة الحيادية/اللا حيادية ومسألة الصدق/التزييف. كوني لا حيادي في موضوع معين يعني اني اعتنق موقف معين لا يلتزم بالحيادية بين الأطراف، لكن، لا يعني هذا اني ألجأ إلى تزييف الحقائق والوقائع من أجل الوصول لغرض ما. لهذا، أنا لا أعيب على أحد اللا حيادية ولكن ما أعيبه هو تزييف الحقائق أو السماح لأي مزيف أن يؤثر على وجهة نظري بتزييفه.

ما أعجبني من رباعيات "صلاح جاهين"

إقلـع غمـاك يـا تـور وارفض تلـف
إكسـر تـروس السـاقيـة واشـتم وتف
قال : بس خطوة كمان . . وخطوة كمان . .
يا اوصـل نهـاية السـكة يا البير يجف
عـجبى

أنا شـاب لـكن عمـرى ولا ألف عـام
وحيـد ولـكن بين ضـلوعـى زحـام
خـايف ولـكن خـوفـى مـنى أنـا
أخـرس ولـكن قـلبـى مـليـان كـلام
عـجبى

ازاى شبـابنـا يقـوم ويـاخـد دوره
من غيـر صـراخ يئذيه ويجـرح زوره
يـا هلترى أحسـن لـه يقعـد سـاكت
أو ينتـرك ولـو خـرج عـن طـوره ؟
عـجبى

أنا قـلبى كان شخشيخة أصـبح جـرس
جلجلت بـه صـحيوا الخـدم والحـرس
أنـا المـهرج . . قمتو ليـه خفتو ليـه
لاف إيدى سـيف ولا تحت مـنى فـرس
عـجبى

أنا كـل يـوم أسـمع . . فلان عذبوه
أسـرح فـى بغـداد والجزاير واتوه
مـا اعجبش م اللى يطيق بجسمه العـذاب
واعـجـب مـن اللى يـطـيق يعذب أخوه
عـجبى

الدنيـا صندوق دنيـا . دور بعـد دور
الدكـة هـى . وهـى كــل الديـكور
يمشـى اللى شـاف . ويسيب لغيره مكان
كـان عربـجــى أو كـان امبـراطـور
عـجبى

خـوض معركتهـا زى جـدك مـا خاض
صــالب وقـالب شـفتك بامتعـاض
هـى كـده . . ما تنولش منهـا الأمـل
غير بعـد صـد ورد ووجـاع مخـاض
عـجبى

قالوا السياسـة مهلكــة بشــكل عـام
وبحورهـا يابنى خشنة مش ريش نعـام
غوص فيهـا تـلقى الغرقـانين كـلهـم
شـيلين غنايـم . والخـفيف اللـى عام
عـجبى

سهيـر ليـالى ويـامـا لفيـت وطفـت
وف ليلـه راجـع فى الضـلام قمـت شفت
الخـوف . . كأنـه كلـب سـد الطريق
وكـنـت عـاوز أقتـله . . بس خفـت
عـجبى

مـع إن كـل الخلق مـن أصـل طين
وكلهـــم بينزلــوا مغمضــين
بعـد الــدقايق والشــهور والســنين
تــلاقى ناس أشـرار وناس طيــبين
عـجبى

لا تجبـر الإنسـان ولا تخـيره
يكفيه ما فيه مـن عقـل بيحيـره
اللـى النهـارده بيطلبه ويشـتهيه
هو اللى بكـره ح يشـتهى يغيره
عـجبى

نظـرت فى الملـكوت كتيـر وانشـغلت
وبكل كلمـة (ليه ؟) و(عشانيه) سـألت
اسـأل سـؤال . . الرد يرجـع ســؤال
واخـرج وحيـرتى أشـد ممـا دخلـت
عـجبى

ولدى نصـحتك لمـا صـوتى اتنبــح
ما تخـافش من جـنى ولا من شبـح
وان هـب فيـك عفـريت قتيـل إسـألـه
ما دافعش ليه عن نفسـه يـوم ما اندبح ؟
عـجبى

ولدى إليك بدل البالـون مـيت بالـون
انفـخ وطـرقع فيه علـى كـل لـون
عسـاك تشـوف بعنيـك مصـير الرجال
المنفـوخين فى السـترة والبنطلــون
عـجبى

يا طير يا عالى فى السـما طظ فيـك
مـا تفتـكـرشـى ربنـا مصـطفيـك
بـرضـك بتـاكل دود وللطيـن تـعود
تمص فيـه يـا حـلو . . ويمص فيك
عـجبى

وقفت سـاعة الصـبح باغسـل سـنانى
قالت لى شـايف قـوتى ولـمعـانـى ؟
إيش تطلب اليـوم مـنى ضحكـة أسد ؟
والا ابتسـامة اعـلانات أمـريكـانى ؟
عـجبى

يأسـك وصـبرك بين إيديك وانت حـر
تيأس مـا تيـأس الحياه راح تمــر
أنا دقت مندا ومندا عـجبـى لـقيت
الصـبر مـر وبرضه اليـأس مــر
عـجبى

يا خـالق الكـون بالحسـاب والجبر
وخـالقنى مـاشى بالاختيـار والجـبر
كـل اللى حـيلتى زمـزميـة أمـل
وازاى تـكفينى لـبـاب القــبر ؟
عـجبى

كام اشـتغلت يا نيـل فى نحت الصـخور
مليـون بئونـه وألـف مليـون هـاتـور
يا نيل أنا ابــن حـلال ومـن خـلفتك
وليـه صـعيبـه عـلى بـس الأمــور
عـجبى

انا كافر متأسلم متشدد؟؟!!!!

بقالي فترة طويلة مبكتبش و ده لأني كل لما ابتدي اكتب أحس بحالة من القرف ....... اه والله قرف. حال الناس غريب و مبقتش أعرف أتكلم مع حد غير ما نوصل في الاخر لحالة من الغليان. و بما إن أنا إنسان بجيب الصداع لنفسي، فبقعد أسأل نفسي "ليه" كتير؟ للاسف لقيت إن مفيش إجابة واضحة غير إن كل واحد رسم لنفسه إتجاه و مش مدي نفسه فرصة إنه يعيد تفكير و نتيجة للعتة اللي بنشوفه من الكثير من رموز المجتمع، الواحد مبقاش عنده إستعداد إنه يسمع منهم، و لو سمع، بيحاول يقاوم لأنه أساسا مش واثق. و على فكرة، أحيانا كتير بكون أنا واحد من الناس ديه.

لو بصيت حواليك هتلاقي نماذج من العتة بالعبيط و بكل الألوان، ماهي الحاجات ديه أذواق برضه. و من أمثلة العتة ده:

١. ناس بتقسم الناس احزاب بدون أي أساس، زي بتوع نعم و لا. مع إن ولا كل بتوع نعم واحد، ولا كل بتوع لا واحد. يعني مثلا بتوع نعم دول، مش كلهم عايزين يقولوا نعم لنفس السبب، و بردو بتوع لا. ولا كل بتوع نعم ليهم نفس الظروف، و بردو بتوع لا. ولا كل بتوع نعم مسلمين، و بردو ولا كل بتوع لا كفره. ولا كل بتوع نعم متشددين، و بردو ولا كل بتوع لا ............ و غيره و غيره من الفروق، يبقى بقى على أساس إيه نجمع بتوع نعم في حزب واحد و بتوع لا في حزب تاني إذا كان من الأول مفيش أساس نعتمد عليه في التصنيف ده. لأ تصدقوا طلع فيه تصنيف، التصنيف ده هو إن الناس بتوع نعم موافقين على موقف سياسي معين، والناس بتوع لا مش موافقين على نفس الموقف السياسي، بس ده كل الموضوع، لا أكثر ولا أقل و ده ببساطة عشان لما كل واحد بيروح يقول نعم أو لا مش بيلاقي خانة في ورقة التصويت مكتوب فوقيها "علل" أو "أذكر السبب".

٢. تلاقي ناس بتدافع عن فصيل معين من الناس سواء كان فصيل سياسي أو حتى حيواني، المهم إنه فصيل و خلاص، بتدافع عنه بكل جوارحها بغض النظر عن أفعال هذا الفصيل، طب أنا مش فاهم، هو انتوا بتدافعوا عنهم من منطلق إيه؟ "قلب الأم"؟

٣. البجاحة المتناهية اللي بنشوفها في الاعلام، بقى عادي جدا انك تشوف رمز إعلامي طالع قدام الناس كلها يعمل شو عجب، ولا كأنها "فقرة الساحر". حاجة سوبر لوكس، و على رأي "محمد خضر" تلاقيه إعلامي محترم انما إيه، متقلعهوش من رجلك.

٤. آجي أتناقش مع حد في موضوع سياسي، ألاقيه بيقولي "ما انتوا عملتو كذا"، استغرب جدا و أسأله "انتوا مين بالظبط؟"، ساعات بيكون الرد "اخوان" و ساعات بيكون "علمانيين" مع اني ولا مع دول ولا مع دول. و بعدين أنا أعرف اني ممكن أكون مع الاخوان أو مع العلمانيين، لكن اني أكون مع الاتنين، تيجي ازاي ديه؟!!!!!! حاجة بقت مسخرة، واللي غايظني هو إن سواء أنا كنت مع دول أو مع دول، "إنت مال ....."، مترد على كلامي و خلاص، يعني أنا واحد بكلمك بالعقل والمنطق، تروح إنت قالب الموضوع ملك ولا كتابة ليه؟؟؟!!!!!! و بعدين ماهو الاتنين عبارة عن مجموعة من الناس، و مفهمش ملايكة، و أكيد ليهم أخطاء، ولا تكونش إنت الطفرة و أنا مش واخد بالي. حاجة يعععععععععععععععععع خالص.

و من ده كتير بقى، حاجات تخلي الواحد قرفان و ملوش نفس يتكلم. بس هنقول إيه، ماهو لما ييجي الزمن اللي الواحد فيه ممكن يكون اخواني و علماني و إحتمال سلفي في نفس الوقت، يبقى مفيش مانع اني أكون كافر متأسلم متشدد و إنت أساسا غلطان انك بتقرا كلامي، "يا ......" مش عارف أشتمك أقولك إيه بصراحة.

طب لو ناس كتير بتكرهك؟!!!

من كام يوم كدة شفت صورة على الفيسبوك عجبتني أوي.

طبعا الصورة دمها خفيف لكن اللي فعلا عجبني فيها انها عبرت عن كلام كنت عايز أقوله. للأسف فيه ناس فعلا مؤمنين بإن لو فيه ناس كتير حواليهم بتكرهم ده دليل على نجاحهم. و للاسف بردو المبدأ ده بنلاقي ناس مركزها عالي بتتبناه و مؤمنة بيه. أنا بصراحة مش عارف ازاي.

لو كل واحد تعمد تجاهل رد فعل الناس و مشاعرهم تجاهه يبقى فقد مصدر مهم جدا لتقييم نفسه و أفعاله. ساعتها هيكون مصدره الوحيد هو النقد الذاتي، بمعنى أخر، هيكون هو الحكم الوحيد على نفسه. طبعا هو شيء عظيم إن الإنسان يكون حكم على نفسه، بس اللي مش عظيم هو إنه يكون الحكم الوحيد.

أحيانا كتير الواحد مش بياخد باله من عيوب فيه مع إنه ممكن يكون بينتقد نفس العيوب ديه في غيره. ليه بيحصل كدة؟ عشان نظرة الإنسان لنفسه مختلفة عن نظرته لغيره. هو ممكن يكون بيلاحظ عيوب غيره لأنه بيكون مراقب أكتر من إنه مشارك، و لو مشارك، في الغالب بيكون متضرر. أعتقد إن مفيش حد محصلش معاه قبل كدة إن الناس نبهته لعيب فيه، و أحيانا ده بيكون دور مهم جدا للاصدقاء والمقربين.

لقد فاض بي الكيل

كنت قد قررت ألا انساق إلى جدال مع أي شخص ممن يدافعون عن إلمجلس العسكري إيمانا مني بإنه سيكون مجرد جدال فارغ لا طائل منه، لكن لقد فاض بي الكيل. إن نوعية الدعاية التي يستخدمها هؤلاء إن دلت على شيء فهي تدل على مزيج من التخبط والعته والصيد في الماء العكر، فما شاهدت من هذه الدعاية ينحصر في:


1. الإساءة إلى بعض شباب التحرير (خاصة البنات) بنشر صور لهم لا تهدف إلا لتشويه سمعتهم وليس لها علاقة بمواقفهم السياسية --> حتى لو فرضنا صدق هذه الصور والادعاءات، أعتقد إنه ليس بجديد على أي إنسان عاقل أن يعلم أن كل بشر معرض للخطأ وإن حتى هؤلاء الذين يحاولون تشويه صورة البعض لهم أخطاء. ثم إنه إذا كان هناك إعتراض على موقف سياسي معين لشخص فلماذا لم يلتزم المعارضون بالرد الموضوعي ............... هذا هو الصيد في الماء العكر.


2. الخروج علينا ببعض الكلام الفارغ الذي لا يحوي إلا معايره لكل من لم يدخل الجيش بإسلوب "لما كنت إنت نايم في بيتكم كنت أنا طالعان عيني في الجيش و بسف التراب.........." --> مع احترامي للشخص الذي يعايرني، دخولك الجيش ليس معناه انك إلة تعبد أو انك فوق النقد والقانون، كما اننا في مجتمع كامل، يحتاج إلي كما يحتاج إليك، فلا تأتي الآن لتعايرني، فإذا تعاملت معك بنفس اسلوبك - الراقي- فسوف أقول لك "لما كنت إنت بتلعب ضغط، كنت أنا بشتغل و طالعان عيني في الأزمة الإقتصادية وكان ليا دوري في إن البلد متؤفش يا روح ...... "


3.الكثير والكثير من الصور والمشاهد التي تبرز مدى عظمة وكرامة وأي بتنجان للجيش --> يؤسفني إن معظم المتعلمين من شباب الجيش يفكر بهذه العقلية السطحية فهم لا يدركون الفرق بين إنتقاد المواقف السياسية وإنتقاد الأشخاص في أنفسهم. دليلي على ذلك هو خروج البعض منهم بالصور التي يظهر فيها بعض شباب الجيش وهم في الصلاة ............ وما علاقة ذلك بما نعيبه عليهم في موقفهم السياسي ؟؟؟؟؟؟؟ .......... وكأن كفانا فخرا وإعتزاز بأن هناك في الجيش من يقيم الصلاة عملا بمبدأ "بوس اديك وش و ضهر و حط جزمة في بوأك وخرس، مش كفاية فيه واحد فيهم بيركعها أساسا، إنت كمان هتعترض"


4. الكثير والكثير من الصور التي يظهر فيها بعض البلطجية --> ومن أنكر وجود بلطجية!!!!!! هذه الصور تدينكم، فان كنتم من أقوى أجهزة الأمن في الدولة - إن لم تكونوا أقواها على الإطلاق - فكيف يعقل انكم لا تستطيعوا القبض على هؤلاء؟؟؟



أخيرا، أرجو من كل من ينوي الدفاع عن المجلس العسكري بألا يخرج علينا بالصور والمشاهد التي تثبت مدى طهارة وعظمة الجيش و ما إلى اخره مما اعتدنا عليه من أنواع الدعاية ...... الدعاية الوحيدة التي قد يقبلها أي إنسان عاقل هي أن يقوم المجلس والجيش بدوره في تأمين البلاد وتنفيذ القانون والقصاص، احضروا لنا هؤلاء القتلة، كفانا صور.

احنا شعب لازم يتربى من الأول

للأسف الشعب المصري لسة بيفكر بنفس الإسلوب اللي اتربى عليه سنين و سنين. مش قادر يفهم إن ديه ثورة، و الثورة مش مجرد ناس بتزعق ولا بتطالب، الثورة لازم أولا تكون على إسلوب الحياه اللي كنا عايشين بيه و على الفكر اللي كان بيتذرع في دماغنا. كان النظام قائم لسبب واحد فقط و هو إنه يمحي شخصية الشعب و يعملهم غسيل مخ معتبر عشان لما هو يقول شمال كله يمشي شمال، و لما يقول يمين كله يمشي يمين، واللي يفكر بس إنه يقف يسأل هو ليه المفروض يمشي شمال، يلاقي ميت واحد بيدفعوه عشان هو واقف قدامهم و معطلهم، و الحقيقة إن محدش فيهم عارف هو ليه أساسا ماشي شمال.

عشنا طول عمرنا بيتقلنا نعمل إيه و نعمله ازاي، كنا دايما موجهين سواء عن طريق الإعلام أو الظروف أو القانون أو حتى العادات اللي اهلنا إتربوا عليها و بالتالي ربونا عليها. فكر توارثته أجيال و أجيال. طب كان إيه الحل، هل كنا هنفضل كدة ...............

الحل كان الثورة ............، و قامت الثورة لكن للاسف الفكر زي ما هو عند معظم الناس. الناس كانت عايزة إن احنا نعمل ثورة و نصلح غلط عشنا فيه سنين و سنين من غير خساير!!!!!!! طب ازاي؟؟؟؟؟

طبيعي جدا إن يبقى فيه خساير، و بالذات لما نكون بنصلح غلط عملناه، و ديه سنة الحياه. هو لما واحد يكون مريض و عنده مرض السمنه و يكون فيه خطر على حياته، مش بيمشي على نظام غذائي معين؟ مش بيحرم نفسه من الأكل؟ مش بيحرم نفسه من حاجات كتير ممكن تكون بالنسبة لمعظم الناس حاجات بسيطة و أساسية؟ .............. هل هو ساعتها بيكون غلطان إنه بيعمل كدة؟ هل هو ساعتها مش بيكون متضايق؟ ............. أومال إيه بقى، و بعدين زي ما هما بيقولوا، مفيش حلاوة من غير نار.

للأسف الناس لسة مش فاهمة و لسة بتفكر بنفس العقلية القديمة. نفس المبادئ الهدامه، اللي تعرفه أحسن من اللي متعرفهوش، و ملنا محنا كنا كويسين و عايشين في سلام، و إيه والآد التيت الفاضيين اللي قاعدين في التحرير، دول ناس تافهة، و يطلعلك ميت تامر من غمرة، و يتصورلك فيديوهات فيها واحد بيولع نار و مكتوب تحت الفيديو إنه واحد من بتوع التحرير، مع إن الفيديو لو ركزت فيه هتلقيه بجودة عاليه جدا، ناقص ينزل بلوراي و ندفع فيه تذاكر، و تلاقي الشخص اللي في الفيديو متصور من كل ناحية ولا كأنه أحمد السقا، و لما تسأل طب هو ليه محدش قبض عليه؟؟؟؟؟؟؟؟ هسسسسسسسسسسسسسسس.

لسة الناس بتسمح لناس تافهة انها تزرع أفكار في دماغهم. و لسة فيه ناس كتير سلبية، مش فالحة بس غير انها تعلي صوتها قدام بعض، كل واحد يشتم في الطرف اللي مش عاجبه، لكن إن يكون ليه دور........... لأ. و ده اللي إتربينا عليه، سياسة برطم بالكلام و قول اللي إنت عايزه بس في الاخر إنت ولا حاجة، كلب و بيهوهو، سياسة خليه يحس إنه حر و ليه رأي، لكن يصدق .......... بالجزمة............................ هنيئا لنا الجزمة.

حسبي الله و نعم الوكيل.

عتاب صديق لصديقه

 احتياجي لوجودك جنبي مش ضعف مني..........انما هي فطرة خلقني عليها ربي
ربي أدرى مني و منك بيها............عشان كدة لازم تفهمني
الصداقة مش مجرد مصاحبة...........انما هي صدق و وفاء
لو جت على المصاحبة...........ما كنت جيت دلوقتي أتكلم معاك
أعرف ناس كتير ييجي بالميات.........لكن اصدقائي مش كتير، يدوب إنت و كمان اتنين معاك

رحلتي مع الخدمة العسكرية و بدلة الغطس

السلام عليكم

النهاردة افتكرت موقف حصل معايا و كان مسخرة. زي ما انتو عارفين، عشان نتخرج من الكلية لازم نخلص خدمة عسكرية، عشان كدة أنا و صحابي قررنا إن احنا نخلصها بدري في الروقان قبل مننشغل في الإمتحانات والحوارات البايخة ديه، عشان كدة عملناها في إعدادي هندسة.

أول يوم رحنا فيه عشان نستلم اللبس كان يوم عالمي، أولا، اكتشفت إن موضوع المقاسات ده بدعة وعشان كدة الناس هناك كانوا بيحاولوا يبعدونا عن طريق الضلال والخطيئة و ده بطريقة عجب و هي إن كل واحد بياخد إلي فيه النصيب و يزبط نفسه على إلي خده. يعني إلي واخد حاجة واسعة عليه، يتخنلها، واللي واخد حاجة ضيقة عليه، يبطل لغ شوية و هو كدة كدة هيخس من كتر التنطيط و الوقفة  في الطابور في عز الشمس.

طب اللبس بقى كان إيه؟؟؟؟؟؟؟؟؟ قميص أزرق بهتان معمول من بواقي الخيش و طالع من بؤ كلب بولدوغ مسعور. أما المنتلون، و اعذروني في المنتلون ديه بس هو ميتألش عليه غير كدة، كان عبارة عن بواقي خيش برضه و لونه أزرق لميع، تقلش منتلون طبال. و عشان بقيت الشياكة تكمل، و عشان البرستيج برضه قدام الناس، كان لازم يبقى فيه طقية، و برضه كانت زرقة و معفنة بس عشان أبقى حقاني، كانت هي أشيك حاجة في الطقم كله، يعني من الأخر كدة، كنت ألبس اللبس ده و أبس في المرايا، أشوف طبال درجة تسعى و بالذات بالقميص أبو ترتر ده ............ يععععععع.

المهم، إيه بقى الموقف إلي حصل معايا؟ في يوم من الايام، لبست الطقم ومتشيك بقى، و نزلت الصبح بدري أوي عشان أكون هناك قبل الطابور عشان مسمعش كلام يفور دمي و أنا أساسا مش ناقص. المهم، وقفت على شارع هرم عشان أشوف ميكروباص يوصلني. الدنيا كانت هو و مكنش فيه حاجة بتعدي. فين و فين لما لقيت ميكروباص وقف و ركبني معاه و مكنش فيه مكان فاضي غير جنب  السواق. ركبت جنبه و هو طول السكة يبصلي بإستغراب و قرف ويدور وشه. أنا طبعا فاهم هو نفسه يقول إيه، بس مفيش حاجة أقدر اعملها. المهم، لما قربنا من الجامعة، قلتله اني نازل الجامعة، ساعتها راح هو متدور ناحيتي و سألني نازل الجامعة أعمل إيه. بصراحة، أنا عذرته. ماهو لازم الواحد يحط نفسه مكانه برضه، واحد طبال نازل الجامعة بدري أوي كدة يهبب إيه؟؟!!!!!!

المهم أنا قلتله اني طالب في كلية هندسة و إن اللبس إلي أنا لبسه ده بتاع الخدمة العسكرية. طبعا أنا ساعتها صعبت على الراجل و كان هاين عليه إنه يكرمشلي حتة بخمسة في أيدي و أنا نازل.

خلصنا اليوم و كنت راجع هلكان و رجعت مع واحد صاحبي البيت عنده قعدت شوية و نزلت عشان أروح. أنا بقى لسة خارج من باب العمارة عنده و مشيت كام متر، لقيت واحد جي في وشي و بيقولي "فيه وحدة بتنادي عليك وراك". رحت لافف أشوف مين الست ديه، لقيتها ست كبيرة قاعدة بتنادي عليا و بتقول "يا ريس، يا ريس، يا ريس". طبعا أنا عرفت ساعتها اني هندم على إلي هيحصل كمان ثواني. سألتها "أيوا يا حاجة، عايزة مني إيه؟". قالتلي "أنا ابني مسافر البرازيل بقاله سنة و مستنية منه جواب، هو معاك؟؟؟" ............

حسبي الله و نعم الوكيل

أنا مش عارفني ............ أنا تهت مني.

السلام عليكم

أحيانا الواحد بيمر بتجارب في حياته بيكون ليها أثر و دور كبير في حياته و سلوكه. من أهم التجارب في حياتي هي دخولي ال ITI

ال ITI هو معهد تكنولوجية المعلومات، و هناك أنا كنت مقدم في منحة لدبلومة مدتها ٩ شهور. المهم أنا دخلت و قضيت هناك فترة طويلة اتعلمت فيها حاجات كتير بس أهم حاجة إتعلمتها هناك هي اني اكسر حواجز كتير جوايا كانت بتمنعني من اني أعمل حاجات كتير و ياما ضيعت علي فرص.

أول حاجة طلبوا مننا نعملها لما دخلنا إن كل اتنين يقعدوا مع بعض شوية و كل واحد يحكي للتاني عن نفسه. طبعا الموضوع مش بيكون سهل عشان كل واحد بيلاقي نفسه مطلوب منه إنه يحكي لواحد غريب عنه تفاصيل عن حياته، ده غير إن أساساً لما تيجي تطلب من حد إنه يتكلم عن نفسه مش بيكون عارف يقول إيه و ميقولش إيه و معظم تركيزه بيكون رايح في إن هو يرسم سيناريو كامل في خياله لشكله، رد فعل إلي قدامه و مدى تقبل الشخص التاني ليه.

تاني حاجة عملناها هي إن كل واحد قام اتكلم عن الشخص إلي كان معاه قدام الناس كلها، و ديه طبعا كانت حاجة صعبة بالنسبالي. و مرت الأيام و اتعلمت حاجات كتير بس أهم حاجة أثرت فيا هي اني غيرت في نفسي حاجات مكانتش عجباني و إتوفرلي الفرصة اني احتك بناس عقليتها مختلفة.

يمكن كلامي ده يظهر للناس على إنه مجرد كلام و خلاص، بس لو عايز تعرف أد إيه الناس بتفرض على نفسها قيود، إسأل أي شخص هو بيحلم بإيه. هتلاقي الشخص ده مستغرب من السؤال كأنك بتسأله سؤال ملوش معنى، مع إن كل واحد فينا عنده أحلام بس هي الفكرة مش في كدة، الفكرة إنه فارض على نفسه و على تفكيره قيود مش مدياله فرصة إنه يتقبل فكرة إنه إنسان ليه أحلام و طموح، و زيادة عن كدة كمان، بتخلق جواه حواجز كتير بتفقده الثقة في نفسه و يبتدي يغلط نفس الغلطة و يرسم سناريوهات في خياله.

وحنا نروح بعيد ليه، جرب كدة تقف قدام المراية و تتكلم عن نفسك و شوف إيه إلي هيحصل. المفترض انك تعرف تتكلم عن نفسك كويس و انك تكون هادي و مش متوتر على أساس انك مش بتتكلم مع حد غريب، إنت بتتكلم مع نفسك. لكن في الغالب إلي هيحصل هو انك مش هتكون عارف تتكلم و هتكون متوتر و حاسس من جواك إن فيه حاجة مش مريحة. ياريت بقى في اللحظة ديه تبص و تشوف تعابير وشك عاملة ازاي، هتحس كأن الشخص إلي في المراية ده شخص تاني غيرك، و ساعتها بقى عايزك تغني "أنا مش عارفني، أنا تهت مني، أنا مش أنا".  تخيل بقى الوضع بيكون ازاي لما تكون في نفس الموقف بس المرة ديه قدام شخص غريب.

طب ازاي، ماهو أنا عملتها و نفعت!!!!!!!!!!

السلام عليكم

مرة كان عندنا محاضرة في الكلية و كان عندنا دكتور بس كان دمه خفيف، و ديه حاجة نادرة مبتحصل. المهم الراجل كان منهمك في الشرح و فجأة كدة راح ساكت و قلنا "حقولكم نكتة". المهم، أنا عجبتني فعلا النكتة و كل مفتكرها أضحك. النكتة بقى كانت:

شخص بيسأل شيخ: هو أنا ينفع أصلي من غير وضوء؟

الشيخ: لأ طبعا يا ابني، لازم تتوضا.

الشخص: طب ازاي، ماهو أنا عملتها و نفعت!!!

أنا اللي عاجبني في النكتة انها بسيطة بس وراها معنى جامد جدا. أنا اللي فهمته منها إن كل واحد ممكن يبص لموضوع من ناحية و يشوفه بطريقة مختلفة تماما عن غيره، و كمان لما الواحد بيحب يستعبط و يتلكك و يوجد لنفسه أي سبب حتى لو كان وهمي، بيعرف ازاي يعمل كدة.

و تعبتوا نفسكوا ليه يا ولاد الـــ.....

السلام عليكم

فيه شوية عادات و تصرفات احنا بنعملها و أعتقد إن الشعب المصري كله اتربى عليها. بس فيه من العادات ديه حاجات ساعات بتنرفزني عشان ببقى شايف فيها تناقض و ساعات مببقاش شايف فيها أي حاجة أساسا و مش بكون عارف هيا جت منين.

من الحاجات ديه مثلا لما عيلة تروح تزور عيلة تانية، أول لما يوصلوا عند الناس و يفتحوا الباب، تلاقي أصحاب البيت بيقولوا "و تعبتوا نفسكم ليه بس و جبتوا ...."، ال يعني هما أساسا كان قدامهم إختيار تاني. مع إن الاتنين عارفين إن ده طبيعي جدا و أكتر من كدة كمان، ده واجب. و بردو عارفين إن لو الناس كانوا جم من غير ميجيبوا حاجة كانوا أول لما يمشوا هيكلوا فرويتهم تهزيء و قلة أدب. طب كان إيه لزمته من الأول الكلام اللي ملوش لازمة اللي ولا يودي ولا يجيب ده.

أنا عارف إن الكلام ده احنا بنعمله بنية حسنة بس أنا بحس إن فيه تناقض، و ياريته في الأخر بيفيد في أي حاجة، بالعكس، ده الكلام ده ممكن يسبب مشكلة.

الدعوة بالميل

السلام عليكم

أظن إن مفيش حد فينا موصلوش ميل من الميلز اللي بتتكلم عن العالم فلان اللي أسلم لما إكتشف كذا، واللي أسلم لما شاف كذا و هكذا ......... تلاقي أول لما الواحد يجيله ميل من دول، جسمه يقشعر و يبقى هيموت و يبعت الميل ده لكل انسان عنده نت. مكدبش عليكم، أنا من فترة كنت بحس بنفس الإحساس ده، لكن مرة كدة تخيلت سيناريو مختلف شوية عن السيناريو اللي كلنا كنا بنحلم بيه وحنا بنبعت المايلز ديه.

قبل محكيلكم عن السيناريو اللي أنا بتكلم عنه، خلينا الأول نوضح شوية نقط أعتقد انها هتفرق معانا و هتخلينا نبص للموضوع بشكل مختلف شوية. طبعا أنا مش بقول انكم لازم تشوفوا الموضوع من وجهة نظري الشخصية، لكن أحب اني أعرض وجهة نظري ديه عليكم و مين عارف، يمكن أطلع صح، أو أطلع غلط.

أولا، لما تيجي تقنع حد بوجهة نظر معينة، لازم تكون صريح مع نفسك في حاجة، و لازم تسأل نفسك سؤال، هو إنت هدفك إيه من الحوار مع الشخص ده، هل كل اللي يهمك انك تطلع من الحوار فايز أو بمعنى أخر إن الطرف التاني يعترف بإن وجهة نظرك هي اللي سليمة؟ ........... ولا إنت على إد مايهمك إن الطرف التاني يقتنع انك صح، يهمك بردو إنه يكون مقتنع ليس عن جهل منه أو عن نقص في المعرفة. عشان تفهم قصدي من السؤال ده، تخيل انك انسان متعلم لكن في مجال تاني غير الطب، و جالك دكتور و قلك إن إنت عندك صداع عشان كذا كذا. طبعا إنت هتصدق. بس الدكتور قلك "هو إنت أي حد يقولك أي حاجة تصدقه!!!.....كذا كذا ده ملوش علاقة أساسا بالصداع، ال سبب فعلا في ال صداع ده هو كذا كذا". تروح إنت مصدق. بس تاني الدكتور قلك "برده مفيش فايدة فيك، هو إنت أي حد يقولك أي حاجة تصدقه!!!....." ............ و هكذا، أنا قصدي من الكلام ده هو إن لما اتنين يدخلوا في نقاش في موضوع معين، ممكن واحد فيهم يقنع التاني بسبب جهله بأبعاد معينة الطرف الأول هو اللي عارف خباياها. السؤال اللي أنا كنت بساله في الأول بقى هو "هل يرضيك إن الطرف التاني يقتنع بكلامك عن جهل منه؟"

ثانيا، لازم ناخد بالنا من إن الإثبات والحجة اللي احنا بنبني عليها وجهة نظرنا واللي بنقنع بيها الطرف التاني، سلاح ذو حدين، ليه؟؟؟؟؟؟؟؟؟ عشان لو في يوم من الأيام الحجة ديه والسبب ده طلعوا باطل، ساعتها الامانة والعقل والمنطق يستدعوا إن الطرفين يعيدوا حساباتهم من الأول لأن الأساس اللي هما بنوا عليه منطقهم إتهد. إذا، الموضوع مش بسيط زي ما احنا بنكون متخيلين و بالذات لما نكون بنتكلم في عمود أساسي من العواميد اللي حياتنا كلها قايمة عليه، الدين والعقيدة. خلاصة الكلام، الطريق رايح جي، لا هو رايح بس، ولا هو جي بس.

أخيرا بعد ما وضحت النقطتين دول، ممكن أحكيلكم عن السيناريو اللي تخيلته. تخيلوا معايا إن فيه شخص لا يعترف بوجود إله. الشخص ده احنا عايزين نقنعه بإن فيه إله واحد بس، اعذروني أنا هنا هعتمد في مثالي على خلفيتي عن الدين الإسلامي لأنه ديني اللي بفهم فيه. هنجيب أدلة و ظواهر علمية العلم توصل إليها مؤخرا و نقارنها بايات من القرآن و نثبت إن الكلام ده مذكور في القرأن من زمـــــــــــان. الشخص اللي قدامنا ده هيتوهم و مش هيكون مصدق نفسه ......... و يشهد الشهادتين، و يسلم.

عارفين المشكلة فين، لما في يوم من الأيام نفس العلم اللي إكتشف الظاهرة العلمية ديه يطلع يقول انها طلعت غلط لأسباب كذا و كذا ........... و إن الحقيقة العلمية السليمة هي كذا و كذا. ده بقى يوصلنا لفين؟؟؟؟ للنقطة التانية اللي اتكلمنا فيها فوق. يعني دلوقتي، إذا كنت إنت اكتفيت قبل كدة بالظاهرة العلمية كإثبات على وجود إله واحد، إذا فمن المنطقي انك تكتفي دلوقتي بالظاهرة الجديدة كإثبات على بطلان منطقك في وجود إله واحد. طب لو إنت أنكرت إن يكون ده إثبات كافي على بطلان منطقك، طب يبقى إنت ازاي رضيت قبل كدة إنه يكون إثبات على صحته؟!!!!! و ده يرجعنا للنقطة الاولى اللي اتكلمنا عنها في الأول، و في الحالة ديه، يبقى إنت فقدت مصداقيتك.

طيب يبقى خلاصة الكلام إيه بقى، ماينفعش تعتمد على ماده دنيوية زي العلوم و الاكتشافات العلمية كدليل على وجود الله و ما يشابهها من حقائق مرتبطة بالعقيدة، عشان العلم اللي أثبت لنا إن الكرة الأرضية كروية، ممكن بكرة يثبت لنا انها مربعة.

عامة، أنا بعد ما تخيلت الكلام ده كله، عملت سيرش على النت و لقيت حاجة بتتكلم عن الموضوع ده. كان فيه مقال مكتوب فيه إن الإمام الشعراوي كان دار حوار بينه و بين أخوه في الموضوع ده لما كان أخوه بيألف كتاب جمع فيه الظواهر العلمية اللي بيأكدها القرأن و في الحوار ده حذر الإمام الشعراوي أخوه من الموضوع ده عشان الدين أسمى من أن يؤكد بإستيعاب البشر لظواهر تفوق تخيلهم و استيعابهم و يكون الاعتراف بالدين مبني على عوامل متذبذبة.

مترو السهرة .............. جديد X جديد

السلام عليكم

النهردة الصبح ركبت المترو زي كل يوم، وصلت لمحطة غمرة و كان لسة شوية على ميعاد اوتوبيس الشغل. قلت أنا استنى شوية في المحطة بدل ما أفضل واقف في الشارع. بمناسبة محطة غمرة، واحد صاحبي كان قالي معلومة مهمة أوي و هي إن محطة غمرة معروفة مابين العمال ب-"المعلفة"، و أنا فعلا إتأكدت من المعلومة ديه و أعتقد أي حد فيكم أسعده الحظ إنه يقف الصبح في محطة غمرة هيكون فاهم ليه.

مــــــا علينا، المهم أنا قعدت في محطة المترو، و شوية كدة و سمعت طقطقة في السماعات و بعدها علطول سمعت الصفارة إلي بيعملوها لما يكون الأخ إلي ماسك المكرفون هيموت و يفقعنا بيان من بياناته إلي أنا بصراحة فشلت فشل ذريع اني أفك طلاسمها. بعد ماسمعت الصفارة، رحت أنا مجهز نفسي و مطأطأ وداني و مسنترها على السماعة عشان أحاول أجمع أي حاجة من اللي الأخ عايز يقوله. إستنيت ثانية، محدش قال حاجة، طب ثانية كمان، بردو مفيش ....... بعد ٥ ثواني تقريبا، لقيت موسيقى طالعة من السماعة!!!!!!!

بعد كام ثانية كدة ابتديت استوعب الموقف، أتاري الأخ أبو ميكرفون كان مزاجه عالي أوي النهردة و حب يدينا درس في الوطنية و راح فاقعنا الأغنية بتاعة "ماتقولش إيه قديتنا مصر، قول هندي إيه لمصر". اللذيذ بقى إن الأغنية إلي بعدها علطول كانت "سلمولي على الحبايب سلمولي".

من هنا يا جماعة لازم نشغل عقلنا و نفهم الكلام إلي مابين السطور، الراجل عايز يقولنا "خلي عند اهاليكم دم و حسوا بقى، و أول حاجة تعملوها عشان تبتدوا تحسوا، هي انكم تسيبوا البلد ........... و على ميسدات بقى".

أمـــــــــك....................كانت قــائد طابية؟!!!!!!!!!

السلام عليكم

النهاردة و أنا راجع البيت من الشغل، كنت ماشي على شارع الهرم و فجأة لقيت ناس كتيرة ملمومة و فيه اتنين مسكين في بعض. المهم أنا كنت لسة بعيد عنهم شوية بس مع ذلك سمعت كلمة كنت فاكر اني مش هسمعها تاني قريب بعد الثورة و محاكمة شوية المسؤولين اللي إتحبسوا والكلام اللي انتوا عارفينه ده. تفتكروا الكلمة كانت إيه؟؟؟؟؟؟؟؟ ................................. "إنت عارف إنت بتكلم مين؟!!!"

أنا بقى سمعت الكلمة ديه و كنت هموت على روحي من الضحك، مش عشان هي قديمة ولا حاجة، بس أصلي افتكرت كلمة شويكار لما قالت لفؤاد المهندس

"أمك......كانت قائد طابية؟"

أنا بصراحة بعد ما الكلمة ديه خرمت ودني كنت هموت وأعرف الشخص الجامد أوي ده هيطلع مين، و فعلا بعد ٥ ثواني عرفت، و فعلا ساعتها بقى الناس كانوا هيجبوني من على الأرض بسبب كريزة الضحك اللي جاتلي ................. الباشا إستجمع كل قوته و زعق بعلو صوته و قال، "أنا قائد اللجنة الشعبية بتاعة الطلبية" ..................... ساعتها بقى افتكرت كلمة نجاح الموجي لما قال "ضحكتني و أنا على الكرسي".

أما بقى باقي السكة، قعدت استغرب إيه حوار الأفلام اللي طلبت معايا ديه!!!!!!!

البيه الشحات

السلام عليكم

من الحاجات إلي بتضايقني أوي هي الشحاتين و إستجابة بعض الناس ليهم. أنا حاولت أتكلم أكتر من مرة مع الناس إلي بتستجيب للشحاتين عشان أفهم وجهة نظرهم، فيه بعضهم كان مقتنع إن الناس ديه غلابة و محتاجين، و فيه كان مقتنع إنه بيعمل إلي عليه و نيته خير والباقي على ربنا، و فيه اللي كان مقتنع إنه لما يدي شحات فلوس يبقى هو كدة بيدفع الصدقة. أنا بصراحة شايف إن ده مش صح، و ده مش عشان أنا بحقد على الشحاتين عشان بيكسبوا أكتر مني ولا حاجة، بس هو عشان أنا مقتنع إن كل فعل ليه رد فعل، والفلوس اللي إنت بتديها لشحات النهردة هتكون دافع ليه إنه يبتدي من بدري شوية بكرة.

عشان نحكم على الموضوع ده، لازم نبص عليه من كذا زاوية. أول زاوية هي، هو الشحات ده يستاهل أساسا انك تديله حاجة. تاني زاوية هي، طب لما هتحب تساعده، تساعده ازاي.

بالنسبة لموضوع إن كان الشحات يستاهل انك تساعده ولا لأ، أنا أعتقد إن 99.9999999% من الشحاتين ميستهلوش، ليه؟؟ عشان لو إنت دورت وراهم هتلاقي إن نفس الشحات اللي إنت كنت بتيديله جنيه ونتا مستني اوتوبيس المدرسة ونتا في إبتدائي عشان هو ياحرام محتاج يعمل عملية الزايدة و معهوش فلوس، هو نفس الشحات اللي إنت لسة امبارح مديله 5 جنيه عشان يعمل برضه عملية الزايدة ........ معلش، أصلها عنده كانت زايدة شوية عن اللزوم.

و خد من ده كتير بقى. بس فيه حاجات دمها خفيف أوي، زي البنت الصغيرة اللي بتدخل المترو و تعدي ترمي لكل واحد ورقه مكتوب فيها مصايب الدنيا كلها في سطرين اتنين لدرجة انك بتبقى نفسك تعيط. بس المفاجئة بقى لما تبص في الورقه اللي مع الشخص اللي أعد جنبك و تلاقي مكتوب فيها مصايب تانية غير اللي معاك. أنا عن نفسي مرة حصلت معايا، الورقه اللي معايا كان مكتوب فيها إن والدها مات من يومين و عايزة فلوس عشان تدفنه. أما صاحبي اللي كان قاعد جانبي، كان مكتوب في الورقه اللي معاه إن والدها رجله مكسورة و محتاج فلوس عشان يصرف على البيت. أنا بصراحة احترت، مكنتش فاهم هل والدها مات من وجع رجليه ولا هو رجله اتكسرت لما وقع على الأرض ميت؟؟؟؟!!!!!!............. هي ديه الحياه، محدش مرتاح.

و بعدين فيه برضه حاجة، أنا اللي أعرفه، إن لو فيه واحد محتاج مساعدة، ممكن يروح جامع أو كنيسة و يطلب المساعدة، و هما هناك بيشوفوا حالته إيه ويساعدوه، لكن طبعا هما مش عايزين كدة عشان المكسب مش هيكون كفاية، ماهو برضه مفيش أحسن من الشغل الخاص.

أما بقى بالنسبة لموضوع تساعد المحتاج ازاي، أنا شايف إن المساعدة متكنش بانك تديله فلوس و تجري، لو إنت عايز تساعد بجد، شوف مشكلته الحقيقية إيه و حاول تحلها أو على الأقل تساعد في حلها. مش كل حاجة هيكون حلها الفلوس.

بس فيه نقطة مهمة برضه، أنا عندي تعليق على اللي بيساعد الشحات من منطلق إنه بكدة بيدفع الصدقة. يا جماعة الصدقة ديه مش عقاب من ربنا ولا هي عبء ترموه على أول ناصية تقابلكم، لازم تفهموا إن الصدقة ديه مسؤولية و تكليف من ربنا لأسباب معينة، و زي ما هو تكليف عليكم انكم تدفعوا الصدقة، فهو بردو تكليف عليكم انكم تتحروا عن المجال اللي بتدفعوها فيه. يعني مش عشان تدفع الصدقة تروح راميها في جيب أول شحات يقابلك.

لما يكون المترو امتداد لطرف سرير الاخ ابو موبايل

السلام عليكم

من الحاجات إلي بشوفها بتحصل في وسائل المواصلات و بالذات المترو، إن واحد يروح مشغل أي حاجة فيها صوت على الموبايل و يعلي الصوت كأنه قاعد في بيتهم و ممدد على السرير. الموضوع ده بيعصبني جدا. و على فكرة، أنا ضد الموضوع ده مهما كان اللي هو مشغله، سواء كان أغاني بجميع انواعها أو كان قرأن. أصل الحكاية مش هو مشغل إيه، الفكرة إن ده مكان عام، بيجتمع فيه ناس عقليتها و طباعها و عقيدتها مختلفة، و عشان كدة ماينفعش كل واحد يجبر باقي الناس انها تسمع اللي هو بيحب يسمعه.

أنا عارف إن معظم الناس اللي هتقرا الكلام هتكون متفقة معايا على الكلام ده في حالة لو كان الشخص ده مشغل أغاني أو أي حاجة تانية مش على مزاجهم، لكن اللي هيعترض عليه بعض الناس هو لو كان مشغل قرأن.

أولا، محدش يفهم كلامي غلط أو يترجمه لنظرية مؤامرة أو فتنة، أنا الحمد لله مسلم و بعتز جدا بديني و مش مستني حد يعرفني إيه هو القرأن. لكن الموضوع بالنسبة لي مسألة مبدأ، و بعدين أنا فكرت كويس قبل موصل لرأييي ده.

ثانيا، تعالوا بقى نفكر مع بعض شوية في الموضوع ده. أنا شايف إن القرأن ده مش لعبة ولا هو كلام نسمعه عشان نتسلى، و ده طبعا مش كلامي أنا، ربنا سبحانه وتعالى قال في كتابه الكريم، إذا قرا القرأن فإستمعوا له وأنصتوا، صدق الله العظيم. و ده معناه إن لما الواحد يشغل القرأن لازم يكون على إستعداد و نية إنه يسمع وينصت، و ركزوا على ينصت ديه كويس. أما إن الواحد يشغل القرأن بس عشان يتسلى، أو إنه أحسن من بلاش، أو إنه أحسن من الأغاني، أو إنه يتمنظر أدام الناس .......... فده غلط. أنا مش عايز أقول حرام عشان أنا مش على العلم الكافي اني أفتي في حاجة زي كدة بس أعتقد إنه على الأقل مش صح.

اللذيذ بقى في الموضوع ده إن فيه ناس بتعمل كدة من منطلق إنه بيهدي الناس و بينضف ودانهم، على أساس إنه بيجبر اللي حواليه من ضعاف الإيمان انهم يسمعوا القرأن يمكن ربنا يهديهم ويكون هو سبب من أسباب ده. مع احترامي الكامل للهدف النبيل، لكن ده ماينفعش. إنت مش من حقك انك تجبر حد إنه يسمع القرأن، مش عشان القرأن فيه شيء غلط ولا حرام، لأ طبعا، بس عشان كل انسان ليه حرية شخصية، والإسلام دين حريات، إذا كان الإسلام معترف بالديانات السماوية الأخرى، و محرمش حد من حرية إختيار دينه و عقيدته، يبقى ازاي بس هيديك حق في انك تحرم الناس من حقها انها تختار اللي تسمعه و تفرض انتا عليها اللي على مزاجك. و بعدين لو انتا عايز فعلا تهدي الناس، فأنا بأكدلك إن الناس مش هتستجيب ليك بالشكل ده، بالعكس، طبيعة البشر كدة، الممنوع مرغوب والعكس، و لما الناس تحس أنها مجبرة تسمع، مش هتسمع و كل اللي هيفكروا فيه هو انك ازاي تعمل كدة و تجبرهم يسمعوا و هيكون احساسهم ناحيتك هو الغيظ و الغضب. و بعدين زي ماقلت قبل كدة، الناس اللي حواليك دول ناس مختلفة عن بعض و عنك، و أكيد فيه منهم اللي عنده أسباب تخليه مش عايز يسمع اللي انتا مشغله، ممكن يكون عشان العقيدة، ممكن يكون لأنه مش هيقدر يركز مع القرأن ......... و بغض النظر عن السبب، و سواء انتا متفق معاه أو لأ، ده حقه.

فيه بردو وسيلة منطقية تساعدنا إن احنا ندرس الموضوع ده. الوسيلة ده إن احنا نطبق مبدأ التعميم. طبعا مش قصدي إن احنا نلبس عمة، أنا قصدي إن احنا نتخيل مع بعض لو السلوك اللي احنا بنتكلم عنه ده إتعمم و بقى  كل الناس ماشية و معلية صوت الموبايل على الأخر و كل واحد مديها على كيفه، هيحصل إيه ساعتها؟ كوكتيل جامد أوي من كل حاجة مش هتعرف تفسر منه أي حاجة و هيجيلك صداع مزمن.

و أخيرا، فيه إختراع إسمه سماعة. الإختراع ده بقاله فترة موجود و أثبت نسبة نجاح عالية والغريب بقى في الإختراع ده إنه بيخليك تسمع من غير ما الناس اللي حواليك يسمعوا معاك ................ سبحان الله!!!!

عشان كدة برجكوم، جربوا تستخدموا الإختراع ده لما تبقوا هتموتوا و تسمعوا حاجة في مكان عام.

حاجات تجنن

السلام عليكم

فيه حاجات و تصرفات الواحد بيشوفها  بتخليه يحس إنه مش فاهم أي حاجة في أي حاجة. معظم الحاجات ده بتحصل في وسائل المواصلات والأماكن العامة. الحاجات ديه بقى بتجنني و بتشغل بالي و أفضل أفكر فيها و أحاول أعرف هي ليه حصلت أساسا و إن كانت هي غلط أساسا ولا لأ، و لو غلط ممكن نصلحها ازاي و هكذا .............

مكدبش عليكم ساعات الموضوع بيزيد معايا و بيسيطر علي و مبعرفش اشيل الموضوع من دماغي إلا لما أوصل لحاجة ليها معنى. و ده اللي خلاني أفكر - بما إن أنا عندي بلوج دلوأتي - ليه متكلمش عن الحاجات ديه، أهو منه أفرغ شوية و كمان أعرف رأي الناس إلي عايزة تشارك.

ليه عملت بلوج

السلام عليكم

في يوم فتحت الميل بتاعي لقيت واحد صاحبي عمل بلوج و بعتلي اللنك. فأنا فكرت في الموضوع ده و قلت في بالي ليه أنا كمان معملش بلوج. ساعات كتير بكون عندي كلام و حاسس اني عايز أقوله حتى لو مفيش حد قرأه أو سمعه، و حتى للناس اللي هيقرأوه مش لازم هيعجبهم الكلام، بس أولا و أخيرا هو كلام انا مقتنع بيه وعايز أقوله. ساعات كتير انك تشوف أفكارك و كلامك مكتوبة قدامك بيساعدك على انك تستوعب أكتر و تفهم أكتر و تاخد بالك من نقط مكنتش شايفها أساسا.

و من هنا أنا قررت اني أعمل بلوج و اكتب فيها اللي أنا عايزه بس طبعا بإحترام و  من غير معتدي على حرية حد أو أهين حد. فكرت في إسم للبلوج و كان أول إسم جه على بالي هو

كلامي و أنا حر